Ating paglalaro'y nagsisimula na
Kasama ka sa mga tawa't hagikhik
Sa ngiting aking kinahuhumalingan
Pagtibok ay may malakas na pagpitik
Hahawakan ang nakasinding bumbilya
Sa mga kamay mong hindi maaangkin
Matinding liwanag satiy bumubulag
Hayaan ang ligayang tayo nang dakpin
Magpapasabog ng kwentong kabaliwan
Hahalahakan ko ang 'yong mga biro
Sa paglimot sa tinakasang mundo
Angkinin ang oras ng larong tuliro
Makikisayaw sa saliw ng musika
Na bakit ngayon mo lamang natagpuan
Sa hagod ng melodiya ng tugtugin
Sa kathang mundo natin madadapuan
Ating kasiyahan ay magwawakas na
Itong hapong aking kinamumuhian
Tunay nating mundo ay natatawag na
Bukas kaya'y muli pang maaaabangan?
--August 22, 2011--
No comments:
Post a Comment